Masakupan ti seguro para iti ngipen iti Medicaid para kadagiti ubbing ken nataengan

Importante ti nasayaat a salun-at ti ngiwat para iti amin iti aniaman a tawen. Mainaig ti salun-at ti ngiwat, ngipen ken gugotmo iti intero a salun-atmo. Mabalin nga apektaran ti ngiwatmo ti dadduma pay a parte ti bagim.

Ti binukbok a ngipen ken sakit ti gugot ket mabalin nga agbanag iti naangot a sang-aw, impeksion ti ngiwat, ken pannakaikkat ti ngipen. Mabalin met nga adda pakainaigan dagiti impeksion ti ngipen iti diabetes, sakit ti puso ken stroke. Malaksid pay iti panagsipilio ken panag-floss iti kada aldaw, importante a bisitaen ti dentista para iti regular a panagpa-checkup ken panagpadalus. Kitaento ti dentista ti salun-at ti ngiwatmo. Nalaklaka nga agasan dagiti problema no nasapa a maduktalan.

Imatonan ti tunggal estado ti bukodda a programa iti Medicaid. Isu a mabalin a pilien ti tunggal estado no ania dagiti ipaayda a benepisyo iti ngipen kadagiti nataengan a nakalista iti Medicaid. Sakupen ti kaadduan nga estado dagiti serbisio iti ngipen para kadagiti nataengan. Ngem basbassit ngem kaguddua dagiti estado ti U.S. ti agdama a mangipapaay iti komprehensibo a panangtaripato iti ngipen. Awan ti minimum a kasapulan ti masakupan ti seguro para iti ngipen iti Medicaid para kadagiti nataengan. Biroken dagiti plano ti Medicaid iti pagnanaedam tapno makitam no maidiaya ti masakupan ti seguro ti ngipen ti nataengan iti estadom.

Sakupen ti Medicaid dagiti serbisio iti ngipen dagiti ubbing nga awan pay 21 ti tawenda a nakalista iti Medicaid. Ti panangtaripato iti ngipen ket parte ti kumpleto a grupo dagiti benepisyo a kasapulan dagiti ubbing ken agtutubo para iti husto a pannakataripato a mangprebentar ti sakit ken para iti panagdakkelda.

Mabalin a mangdisenio dagiti ahensia ti Medicaid iti estado iti bukodda a programa iti ngipen. Ngem masapul a sakupenda ti ad-adu ngem dagiti emerhensia a serbisio. Masapul nga iraman ti amin a programa iti ngipen dagiti ubbing iti Medicaid dagitoy 3 a banbanag:

1. Panangpabang-ar iti sakit ken impeksion
2. Pannakaisubli ti ngipen
3. Panangtaginayon iti salun-at ti ngipen

No masapul ti ubing ti panangtaripato iti ngipen a nasisita nga banag maipanggep iti medisina, sakupento ti Medicaid dagita a serbisio. Kasta met, no ti kondision ti salun-at ket agkasapulan iti pannakaagas a matakuatan bayat ti regular a panag-screen iti salun-at, sakupento ti Medicaid dayta a pannakaagas. Awan banagna no dagiti serbisio a panangtaripato ket nairaman iti plano ti Medicaid ti estado wenno saan.

Ti CHIP ket isu ti Children's Health Insurance Program wenno programa para iti pannakaiseguro ti salun-at dagiti ubbing. Ipaay ti CHIP ti nababa ti bayadan a masakupan ti seguro ti salun-at kadagiti ubbing kadagiti pamilia nga adu ti matgedanda isu a saanda a kualipikado para iti Medicaid. Iti sumagmamano nga estado, dagiti benepisyo iti ngipen iti CHIP ket kapadpada met la ti Medicaid a programa ti estado. Kadagiti dadduma met nga estado, ti CHIP ket naisina a programa manipud iti Medicaid. No kasta, mabalin a pilien ti maysa nga estado nga idiaya dagiti benepisyo iti ngipen dagiti ubbing a katupag ti 1 kadagitoy 3 a pagpilian:

1. Ti kalalatakan a pederal a plano iti ngipen ti empleado para kadagiti dependent
2. Ti kalalatakan a plano a napili para kadagiti dependent iti plano iti ngipen ti empleado iti estado
   Wenno
3. Ti masakupan ti seguro iti ngipen ket maidiaya babaen iti kalalatakan a pribado a plano ti seguro iti estado

Awan ti gagangay a listaan dagiti serbisio para iti masakupan ti seguro para iti ngipen dagiti ubbing iti Medicaid. Pilien dagiti estado no ania a panangtaripato ken pannakaagas ti sakupen ti Medicaid ken no kasano kasansan. Mabalin a sakupen ti sumagmamano nga estado dagiti panagpa-checkup ken panagpadalus ti ngipen iti 2 a daras kada tawen. Sakupen met dagiti dadduma nga estado ti 1 laeng a kadawyan a panagbisita iti dentista.

Ti binukbok a ngipen, wenno cavities, ti kaadduan a sakit dagiti ubbing nga agtawen iti 6–18.¹ Isu a saan a nakaskasdaaw nga ipaganetget dagiti programa ti Medicaid ti pananglapped kadagiti panagbukbok ti ngipen. Mabalin a mairaman kadagiti kadawyan a pannakaagas ti*:

• Eksamen ken x-ray ti ngipen — Babaen iti eksamen mabalin a kitaen ti dentista dagiti ngipen ken gugot para iti aniaman a panagbukbok wenno sabali pay a problema. Dagiti x-ray ket ladawan a mangipakita iti dentista kadagiti puon ti ngipen, kitaenna dagiti tultulang iti aglawlaw ti ngipen ken agbirok kadagiti seniales ti panagbukbok wenno sabali pay a sakit.
• Dagiti dental sealant — Dagitoy ket naingpis a pangkalupkop a maipinta kadagiti sangi (makinlikod a ngipen). Punuen ti sealant dagiti abot ken likkaong a mabalin a pakaurnongan ti makan ken mikrobio, ken agbanag kadagiti panagbukbok.
• Dagiti pannakaagas iti fluoride — Agusar ti dentista iti brush wenno kapas tapno mangipinta iti temporario a pangkalupkop iti ngipen. Makatulong ti fluoride a mangpasardeng iti panangrugi dagiti panagbukbok ken pasardengenna ti panagwaras dagiti agdaman a binukbok.

Gagangay a sakupen ti Medicaid dagiti sabali pay a serbisio iti ngipen no dagitoy ket nasisita nga banag maipanggep iti medisina. Kas koma braces tapno paglintegen dagiti ngipen dagiti ubbing. Wenno panangikkat iti wisdom teeth. Ngem mabalin nga agsasabali dagiti estado iti pagalagadan ti medikal a kinasisita.

Minilion dagiti ubbing ken agtutubo ti kualipikado para iti libre wenno nababa ti bayadan a masakupan ti seguro para iti salun-at ken ngipen babaen iti Medicaid ken CHIP. Ket ngumatngato dayta a numero iti kada tawen. Ngem dakkel a karit ti kabaelan a mangala iti panangtaripato. Adu dagiti ubbing nga awanan iti dentista iti asideg ti pagnanaedanda. Wenno mabalin nga awan ti paglugananda.

Saan a maawatan ti dadduma a pamilia a masapul a regular a mapan dagiti ubbing iti dentista, uray pay no awan ti problema. Adda dagiti nagannak a di makaammo a maikari dagiti ubbing wenno annakda a mangala kadagiti serbisio iti ngipen. Mabalin met makalapped ti pagsasao isu a narigrigat ti mangala iti panangtaripato iti ngipen.

Sikakari ti UnitedHealthcare a tumulong kadagiti miembromi a mangala iti amin a benepisyo a maidiaya babaen iti plano da iti salun-at iti Medicaid. Bisitaen ti InsureKidsNow.gov tapno agbirok iti dentista iti komunidadyo a mangag-agas kadagiti ubbing ken umaw-awat iti Medicaid ken CHIP.

*Dagiti benepisio, dagiti feature ken/wenno dagiti device ket agbaliwbaliw depende iti plano/lugar. Mabalin a maipakat dagiti limitasion ken/wenno dagiti maiparit iti network. Para kadagiti detalye maipapan kadagiti eksakto a benepisio a magun-od kadagiti plano ti Medicaid iti lugaryo, maidawat nga agsapulka kadagiti plano babaen iti panangusar iti ZIP code iti pagnanaedam.
¹ Salun-at ti Ngiwat dagiti Ubbing (CDC, April 06, 2022)